In Aahon kay Samundar Main ...

(( IN AAHON KAY SAMUNDAR MAIN  ))

in aahon kay samundar main

jab kuch dair ko socha karta hoon

ek shor sa ander paata hoon

har aan kisi say darta hoon

har su hi barpa toofaan hay

chaak sabhi ka girebaan hay

koi rahuma nahi koi manzil nahi

ahl-e-ikhlaas ab koi dil nahi

nafsa nafsi har su pheli hay

har chaadar zulm say meli hay

bhook nay kar choray takhleeq darinday

ban bethay rahmaan say shaitaan kay banday

masoom khwaboon ki cheekhti tabeerain hain

hirs o hawas ki atraaf main tadbeerain hain

muskurahaton ki lay li hay jaga khudgarzi nay

juda kar daala aqwaam ko apni apni marzi nay

sach ban gaya hay soday salf kay bhaao

sachay ho phir bhi daam chukaao

emaan charhaaya hum nay soli par dolat ki

ab afsanay hain baatein khuloos ki, muhabbat ki

rota tha dil humaray ajdaad ka takleef dekh kar gairon ki

ab mera ghar, meray bachay, meri dolat zanjeer hay pairon ki

amal choot gaya hum say ab sirf bayaan baaqi hain

kuch zakhmi zakhmi ahle haq humaray darmiyaan baaqi hain

ik an dekhi talwaar latakti har sar par yahan

haq mil bhi jaata aksar, magar mar kar yahan

kis qadar kijyay shikwa nizaam ka aur hukumat ka

har fard bhoola betha sabaq ye sadaqat ka

roshni umeed ki dilon kay ander hay

par andheron main gum aahon ka samundar hay

ab uthna hay har fard ko behtri kay liay

jorni hay ek ek boond sab ki khushi kay liay

khudgarzi ki chaadar khudaara phenk do utaar kar

ana chor kar apni aur insaan say piar kar

rahnumaai kaafi hay Khaatim-un-Nabi'een (SAAW) ki hum ko

sath kitaab ata ki RABBUL ALAMEEN ki hum ko

naqqaali say mizaj o tehzeeb ki kho jata hay waqar

shanaakht kho dena hi hay sab say giraan baar

"andaaz-e-bayaan garchay mera shoq nahi hay"

"shayad kay teray dil main utar jaaey meri baat"